Урыстәыла Жәлар рартист иажәақәа рыла, 2027 шықәса ааԥынразы иалагоит урыстәыла-белоруссиатәи арежиссиор-актиортә курс ахь адкылара. Иара ажәалагала ҟаиҵеит аԥснынтәи аҿар рзы ҭыԥқәак алкаазарц. Акурс аҭалара алшоит Сергеи Безруков ихаҭа дызлахәхо аицлабратә лыԥшаара аихшьаалақәа рыла.

Артист инаҵшьны иазгәеиҭеит, акурс ианалгалак ашьҭахь аушьҭымҭацәа Аԥсныҟа рыхынҳәра аҵара аҭагылазаашьақәа ируакхароуп ҳәа. Иара игәаанагарала, уи амилаҭтә театри акинематографи рыҿиаразы акрызҵазкуа гәазыҟаҵараны иҟалоит.