Нестор Лакоба иҭоурых-мемориалтә музеи аҿы иаатит аԥсуа политик иҷкәын - Рауф Лакоба диижьҭеи 100 шықәса аҵра аҳаҭыраз афотосахьақәа рцәыргақәҵа.

«Иахьа ҳара ҳаизеит Нестор Лакоба иԥа даҳгәалаҳаршәарц, уи диижьҭеи шәышықәса ҵит. Ибзианы ижәдыруеит илахьынҵахаз, ари аҭаацәараҟынтә уаҩ днымхеит. Рауф Лакоба дхәыҷы бзианы изҳауан, ауаа дырзааигәан, ауацәа, аҩызцәа бзиа ибон», - лҳәеит амузеи адиректор Лиудмила Малиаԥҳа.

Ацәыргақәҵахь инагоуп Нестор Лакоба иҭаацәа рфотосахьақәа, аҭоурыхтә кадрқәа, Аԥсны анапхгаҩи СССР иреиҳаӡоу апартиатә напхгара – Иосиф Сталин, Лавренти Бериа уҳәа еицҭырхыз афотосахьақәа.

Ауснагӡатә мҩаԥысит Лакоба имҩа аҩны №32 аҿы. Ара инхон аԥсуа политик иҭаацәеи иареи.

1937 шықәса жьҭаара 31 азы дырбаандаҩын 15 шықәса зхыҵуаз Рауф, ԥшьышықәса инарзынаԥшуа Аҟәа, Қарҭ, Москва абахҭақәа рҿы дҭакын. Иара ицҭакын «Аԥсуа рԥарцәа рус» иаҵанакыз Николаи Лакоба, Ҭенгиз Лакоба, Николаи Иналиԥа.

13–15 шықәса зхыҵуаз аҷкәынцәа аконтрреволиуциатә террористтә ус рнапы алакын ҳәа ахара рыдҵан ашьра рықәҵан. Ԥхынгәы 28, 1941 шықәсазы Рауф, Николаи, Ҭенгьиз рыԥсҭазаарақәа ҿахҵәан.