Шьалодиа Михаил-иԥа Аџьынџьал - СССР-и Аԥсни Рышәҟәыҩҩцәа реидгылақәеи, СССР-и Аԥсни Ржурналистцәа реидгылақәеи, Урыстәыла Ашәҟәыҩҩцәа реидгылақәеи, Ашәҟәыҩҩцәа реидгылақәа Жәларбжьаратәи реилазаареи дрылахәын. Д.И. Гәлиа ихьӡ зху Аԥсны аҳәынҭқарратә премиеи, В. Маиаковски ихьӡ зху Жәларбжьаратәи апремиеи дырлауреатын, «Ахьӡ-Аԥша» аорден II аҩаӡареи ианашьан. Аԥсны жәлар рышәҟәыҩҩы ҳәа ахьӡ ҳаракы ихҵан.

Шьалодиа Аџьынџьал исценариақәа рыла акиностудиа «Мосфильм» аҟны иҭыхын афильмқәа – «Иԥшьоу ажьира асаркьал», «Амзаҿа ангыло».

Ашәҟәыҩҩы ипиесақәа рыла иқәыргылан аспектакльқәа жәпакы С. Ҷанба ихьӡ зху Аԥсуа ҳәынҭқарратә драматә театр асценаҟны, иара убас Гроднотәи аобласттә драматә театри   Махачкалатәи адраматә театри рысценақәа рҟны.

Шьалодиа Аџьынџьал иаԥиҵаз ԥсра зқәым арҿиамҭақәа доуҳатә ҭынхак аҳасабла абиԥара ҿарақәа ирзаанхеит.