70 шықәса – иагьырацәам, иагьмаҷым, ари зҭәымҭа иҭагылоу ауаҩ иқәроуп. Шәыԥсҭазаара зегьы аҟазара иазышәкит. Имаҷым аԥсуа культура ашьҭыхреи аизырҳареи рзы ижәбаз аџьабаа. Шәахьыҟазаалак, шәнапы злашәклак аус гәык-ԥсыкала шәазнеиуеит, шәымч-шәылша зегь адышәҵоит.

Актиор, арежиссиор иаҳасабала аамҭак азы Аԥсуа ҳәынҭқарратә драматә театр амаҵ азыжәуан, анаҩс Тҟәарчалтәи акультура аҩны адиреқторс шәыҟан. Иахьа И. Кортуа ихьӡ зху Жәлар рҟазара ареспубликатә центр напхгара ашәҭоит. Шәара ишәыбзоуроуп Тҟәарчалтәи атеатр атруппеи аԥсуа быргцәа ретнографиатә ансамбль «Нарҭааи» реиҭашьақәыргылара.

Шәара еиҿышәкаауеит еиуеиԥшым афестивальқәа, аконкурсқәа, аконцертқәа, ацәыргақәҵақәа. Урҭ ирыбзоураны иаашәырԥшуеит аҟыбаҩ ҷыда змоу ахәыҷқәеи аҿари. Изызҳауа абиԥара ирылашәааӡоит итрадициатәу ҳмилаҭтә культурахь абзиабара.

Иазгәаҳамҭар залшом, акультура анаҩсгьы, шәара активла ҳтәыла аполитикатәи ауаажәларратәи ԥсҭазаара шәхы алашәырхәуеит. Шәара шәалахәын ҳажәлар рмилаҭ-хақәиҭратә қәԥара, еицырдыруа аԥсуа шәҟәы знапы аҵазыҩҩыз шәреиуоуп. Ҳажәлар аԥсреи-абзареи рыбжьара ианҭагыл, лакҩакрада абџьар шьҭышәхит, шәрылагылеит ҳаԥсадгьыл ахьчаҩцәа.

Шәџьабаақәа зегь азгәаҭо, шәара ишәанашьоуп еиуеиԥшым аҳамҭақәеи ахьӡ ҳаракқәеи –  Леон иорден, «Ахьӡ-Аԥша» аорден III аҩаӡара, «Аԥсны зҽаԥсазтәыз акультура аусзуҩ» уҳәа уб. иҵ.

Ҩаԥхьа гәык-ԥсыкала шәиубилеи шәыдныҳәало, ишәзеиӷьасшьоит агәабзиара, ашықәснҵыра рацәа, азҿлымҳара ду зцу апроект ҿыцқәа аԥсҭазаара раларҵәара алшара шәоуааит.