Асааҭ 16:00 рзы Ахьӡ-Аԥша амузеи аҟны имҩаԥгахоит акәашаратәи амузыкатәи аколлективқәа «Ритмы Кавказа», «Аԥсны», «Диоскуриа», «Иаирума» злахәу аконцерт. Анаҩс имҩаԥгахоит авикторина.

Дырмит Гәлиа ихьӡ зху алитература-мемориалтә музеи аҟны асааҭ 18:00 рзы иаадыртуеит Аиааира амш 30 шықәса ахыҵра иазку афотоцәыргақәҵа. Аԥсны аҭоурыхи аҭыԥ ԥшьақәеи ирызкны алекциақәа ирыԥхьоит Аԥснытәи аҳәынҭқарратә университет апрофессор Мзиа Кәыҵниаԥҳаи аетнолог Марина Барцыцԥҳаи. Ахәылԥаз хыркәшахоит «Апоезиа асааҭ» ала.

Аԥсуа ҳәынҭқарратә музеи аҟны асааҭ 19:00 - 24:00 рзы иаартхоит ҩ-фотоцәыргақәҵак: «Ииасхьоу анырра», «Аԥсуаа рҟны асра – иџьашьатәу адунеи».

«Аҵх амузеи аҿы» – жәларбжьаратәи акультуратә акциа, раԥхьаӡа акәны Франциа 1999 шықәсазы имҩаԥган. Аԥсны ари акциа мҩаԥган 2015 шықәсазы Аҳәынҭқарратә музеи аԥшьгарала.