Аԥсны акультура аминистр Даур Ақаҩба Аахыҵ Уаԥстәылатәи иколлега Радмила Дзагоева дидикылеит.

«Ҳаҭыр зқәу Радмила Филипп-иԥҳа, ҳҩызцәа, ҳашьцәа, агәахәара ду ҳаманы Аԥсны бзиала шәаабоит ҳәа шәаҳҳәоит. Иаҳгәалаҳаршәоит мшаԥымзазы шәтәылаҿы Аԥсны акультура Амшқәа шымҩаԥысуаз, ахада Алан Едуард-иԥа Гаглоев иаҳзыҟаиҵаз адгылара ду, ҳколлегацәа заҟа иаҳзыҳаҵҳаҵоз», - иҳәеит Ақаҩба асасцәа аԥсшәа раҳәо.

Аахыҵ Уаԥстәыла акультура амшқәа Аԥсны иаатуеит лаҵара 31 рзы Фазиль Искандер ихьӡ зху Аурыс драматә театр аҿы.

«Даара ҳазыԥшын ҳашьцәа шәахь- Аԥсныҟа аара. Агәахәара ду ҳамоуп уи ахьалшаз. Аԥсни Уаԥстәылеи русеицура иахьакәым ианалагаз, уи ашьаҭа ду амоуп. Ирацәоуп еицынагӡоу апроектқәа. Ԥхьаҟагьы ҳкультурақәа рыбжьара аизыҟазаашьақәа рыҿиара агәацԥыҳәара ҳнаҭоит», - лҳәеит Радмила Дзагоева.

Аԥсны акультура амшқәа Аахыҵ Уаԥстәыла имҩаԥысит Цхьынвал. Ахәаԥшцәа идырбан Аԥсны Аҳәынҭқарратә аҿар ртеатр инарыгӡо Аԥсны жәлар рышәҟәыҩҩы Шьалодиа Аџьынџьал иажәабжьқәа рмотивқәа рыла иқәыргылоу аспектакль «Аибашьра ахԥатәи амш», иара убас Аԥсны зҽаԥсазтәыз жәлар рыкәашареи рышәаҳәареи рзы аҳәынҭқарратә ансамбли аԥсуа естрада артистцәеи рықәгылара мҩаԥган.