Анаҩс атеатр ашҭаҿы Аҳәынҭқарратә бираҟ иазку аныҳәатә концерт еиҿкаан. Аҟазаратә коллективқәеи аԥсуа естрадатә артистцәеи злахәыз аконцерттә программа ҭбаан. Аҟәа ақалақьуааи асасцәеи рҿаԥхьа иқәгылеит Даур Арухаа, Ҭемыр Ҭаниа, авокалтә-инструменттә ансамбль «Аԥсны», ахәыҷтәы акәашаратә ансамбль «Уарада», Омар Сангәлиа, аетнографиатә хор «Нарҭаа», ахәыҷтәы студиа «До – Ре – Ми», Нана Черқьезиаԥҳа, адует «Анатрио», Авто Конџьариа, Рамина Заде, Аҳәынҭқарратә ахәыҷтәы акәашаратә ансамбль «Абаза», Одиссеи Аџьынџьыал, Валериа Делԥҳа, Аҳәынҭқарратә акәашаратә ансамбль «Кавказ», Анатоли Алҭеиба, Хьыбла Мықәԥҳа.
Ԥхынгәы 23 рзы Амҳаџьыраа рыԥшаҳәаҿы Сегреи Багаԥшь ихьӡ зху ашҭаҟынтә С. И. Ҷанба ихьӡ зху Аԥсуа драматә театр ашҭаҟынӡа Аԥсны Атәылахьчара Аминистрра иатәу аоркестр рыцны ажәлар рымҩасра мҩаԥысит.