«Ҳаҭыр зқәу Гәдоуҭатәи жәлар рвокалтә-инструменттә ансамбль «Риҵа» алахәылацәа!

Аԥсны Аҳәынҭқарра Акультура Аминистрра ахьӡала ишәыдысныҳәалоит шәиубилеи – ансамбль 50 шықәса ахыҵра.

Жәлар рышәаҳәареи рыкәашареи амилаҭ рдоуҳатә беиара иахәҭакуп, аиҳарак аҭоурых иақәлоу ҳажәлар рзы. Ҳажәлар рҟазара азқьышықәсақәа иргәылганы, аӡыблара иаламырӡкәа иахьа уажәраанӡа еиқәырханы иаҳзааргеит. Ҳашәақәеи ҳакәашарақәеи ирныԥшуеит ҳҭоурых зегьы. Иахьатәи абиԥара ируалԥшьоуп урҭ зегьы реиқәырхара ҿыц еиҵагыло абиԥарақәа рзы.

Аԥсуа жәлар рашәаҳәаратә ҟазара аихаҳареи аларҵәареи аус аҟны алшара дуқәа аазырԥшхьоу ируакуп ансамбль «Риҵа», уи иабзоураны акыр зҵазкуа ашьаҭа ааннажьит аԥсуа культура аҭоурых аҿы. Иахьагьы ансамбль иаанарԥшуеит аихьӡара дуқәа.

Жәлар рвокалтә-инструменттә ансамбль «Риҵа» ахьӡ-аԥша хара инаҩхьеит. Иҭбаауп агастрольтә географиа – Москва, Нальчик, Черкесск уҳәа егьырҭ Урыстәыла ақалақьқәа рҟны, иара убас атәылақәа – Польша, Венгриа, Германиа, Ҭырқәтәыла, Америка, Куба уҳәа рҟны шәҟазара дшәырбахьеит.

Шәиубилеи шәыдныҳәало, ишәзеиӷьасшьоит зегь раԥхьаӡа иргыланы арҿиаратә гәацԥыҳәара, ҩаԥхьагьы аихьӡара дуқәа. Ишәыцзааит аманшәалара, ақәҿиарақәа. Аԥсуа культура шәагымзааит!»