Аԥҟара инақәыршәаны, Т. Шь. Аџьба ихьӡ зху ахәыҷқәеи ақәыԥшцәеи ирызку аҳәынҭқарратә литературатә премиа анашьаразы арзаҳалқәа ралаҵара аҿҳәара хыркәшоуп. Апремиа анашьаразы акомиссиа ашҟа инашьҭын х-усумҭак:
- Аԥсны Аҳәынҭқарра Аҵареи абызшәатә политикеи рминистрра иқәнаргылеит Т. Шь. Аџьба ихьӡ зху апремиа аиуразы апоет Заира Ҭҳаиҵыкәԥҳа ахәыҷтәы журнал «Амцабз» №3 2019 ш., №№4-5 2020 ш., №№4-5 2021 ш. ианылаз лажәеинраалақәа.
- Аредакциа ажурнал «Алашара» Т. Шь. Аџьба ихьӡ зху апремиа аиуразы иқәнаргылеит апоет Гәында Сақаниаԥҳа лажәабжь кьаҿқәа «Ажәҵыси ахәлыԥҵыси» захьӡу аж. «Алашара» №3 2020 ш. ианылаз.
- Аԥсны ашәҟәыҩҩцәа Реидгыла Т. Шь. Аџьба ихьӡ зху апремиа аиуразы иқәнаргылеит апоет Гәында Кәыҵниаԥҳа лажәеинраалақәа аж. «Амцабз» №2 2020 ш. ианылаз.
Аԥсны Аҳәынҭқарра Акультура Аминистрра ишьақәнарӷәӷәаз аԥҟара инақәыршәаны, апремиа аиуразы акомиссиа алшара рымоуп иқәыргылоу арҿиамҭақәа рыхәаԥшра, реилыргара, уи ашьҭахь имҩаԥгахоит маӡалатәи абжьыҭира.
