 |
 |
 |
 |
 |
 |
Аконцерт иаҭааит Аԥсны ахада Бадра Гәынба, Урыстәыла ахада Иусбарҭа анапхгаҩы актәи ихаҭыԥуаҩ Сергеи Кириенко, Аахыҵ Уаԥстәыла аԥыза-министр Константин Џьуссоев, ареспублика аминистррақәеи аусбарҭақәеи рхаҭарнакцәа, аибашьра аветеранцәа.
Еизаз рҿаԥхьа иқәгылеит аԥсуа естрада артистцәа: Анатоли Алтеиба, Ильда Қәычбериа, Џьимми Шәманиа, Алхас Ферзба уҳәа. Дара инарыгӡеит аибашьра иалиааз ашәақәа. Уамакала иԥханы ахәаԥшцәа ирыдыркылеит Аԥсны Жәлар рартист, Урыстәыла зҽаԥсазтәыз артист Алиса Гыцԥҳаи урыстәылатәи ашәаҳәаҩ Антон Лаврентиеви еицнырагӡаз ашәа.
Аконцерт цонаҵы аекран аҟны иддырбон аибашьратә архив, иара убас Аԥсны раԥхьатәи ахада Владислав Арӡынба иқәгыларақәа.
Аиааиреи Ахьыԥшымреи 32 шықәса ахыҵра иазкыз аныҳәатә уснагӡатәқәа хыркәшахеит асалиут ала.