Аблоҭиа Виачеслав Андреи-иҧа - кинорежиссиоруп, СССР акинематографистцәа Реидгыла далахәуп, акиностудиа «Аҧсуафильм» адиректор хада, асахьаркыратә напхгаҩы, Аҧсны зҽаҧсазтәыз артист, «Ахьӡ-Аҧша» III аҩаӡара аорден ианашьоуп.
Диит 1942 ш. Гәдоуҭа ақалақь аҟны. 1962 ш. Цандрыҧшь ашкол-интернат далгеит. Аус иуан   киномеханикс акинотеатр «Дружба» аҟны Гәдоуҭа. 1962 шықәсазы аррмаҵура дахысит. Напхгара аиҭон агарнизон аҟны арратә оркестр, абыкь аирҳәон. Данқәыҧшыз инаркны аҟазара инапы алакуп.

1968 ш. Қарҭтәи аҳәынҭқарратә атеатртә институт актиортә  факультет далгеит. Аус иуан Аҧснытәи адраматә театр аҟны. Арольқәа жәпакы наигӡахьеит. Уи инаваргыланы аус иуан асатиратә театр «Чарирама» аҟны. 1979 ш. Москва ақ. Аҳәынҭкино аҟны СССР иреиҳаӡоу акинорежиссиортә курсқәа дрылгеит. 1982 ш. далгеит Георги Данелиа иҟазарҭа. Исценариқәа ирылхны афильм кьаҿқәа ҭихит: «Ажәытә каруаҭ», «Агәрагара», «Аиҧхныҩлара», «Аҽы шкәакәа еиҕьуп». Адиплом  «ибзиаӡоуп» ҳәа ихьчеит. Аус иуан акиностудиа «Ақырҭуа - фильм» аҟны. Раҧхьаӡакәаны аҧсышәала зметраждуу  афильм «Асувенир» ҭихит. Қырҭшәала афильмқәа «Ашьха иҟоу асасааирҭеи» «Вера хәыҷы» 2-тәи асериеи адублиажҟаҵара арежиссиорс дрыман. Дыхәмаруан афильмқәаа «Ажьа иаҵәақәа», «Хҭарҧа шкәакәа», «Амзаҿа ангыло», «Араӡын ҽыҵга», «Чегьемтәи адетектив». 

1989 ш. Аҟәаҟа диасуеит. Аҧсны акиностудиа «Аҧсуафильм» еиҿикаауеит. Ари акиностудиаҟны «Ленфильми» иареи Ф. Искандер иаҧҵамҭа «Напхьарџь» ала зметраждуу афильм ҭырхит.  Ателефильмқәа жпакы ҭиххьеит.  Амассатә усмҩаҧгатәқәа режиссиорс дрыман. 

Аҵыхәтәантәи ашықәсқәа рзы аҧсышәала амультфильмқәа «Карлсон» (2 фильмк), «Хырҵәрыҧшь» (3 фильмк), «Алым хәыҷи акәуеи» (3 фильмк), зметраждуу асахьаркыратә фильмқәа «Оскар», «Серафино», «Абырг Хаттабыч», «Ҷышәшәына  лых-каканк», «Ацгәы еиқәаҵәа, ацгәы шкәакәа», «Агладиатор» режиссерс, рдублиаж авторс дрымоуп.