 |
 |
 |
 |
 |
 |
1970–1972 шықәсқәа рзы С. Қорсаиаԥҳа аҵара лҵон М. Горки ихьӡ зху Аҟәатәи арҵаҩратә институт аҟны. 1972 шықәсазы дҭалоит А. В. Луначарски ихьӡ зху Аҳәынҭқарратә атеатртә ҟазара аинстут (уажәы Урыстәылатәи атеатртә ҟазара академиа) атеатрҭҵааратә факультет. Уаҟа лҵара хлыркәшоит 1977 шықәсазы (адиплом – Г-1 № 516380).
Аԥсныҟа даныхынҳәы, иаразнак далагоит аусура С. Ҷанба ихьӡ зху Аԥсуа ҳәынҭқарратә драматә театр алитературатә ҟәша аиҳабыс, нас диаргоит Аԥснытәи АССР Акультура Аминистррашҟа аҟазара аҟәша аиҳабыс.
Раԥхьаӡакәны аԥсуа ҟазара ҭызҵаауа ажурнал «Аԥсны аҟазара» анаԥҵаха (март, 1979 ш.), С. Қорсаиаԥҳа ажурнал аҟәша аредақторс аусура далагоит. 1979 шықәса октиабр мзазы Акультура аминистрра дрышьҭуеит Аҳәынҭқарратә атеатртә ҟазара аинстут аспирантура ашҟа. Аспирантура даналга, 1982 шықәсазы дхынҳәуеит аусура ажурнал «Аԥсны аҟазара» аредакциахь. Уи инаркны 2013 шықәсанӡа С. Қорсаиаԥҳа аус луан ажурнал аҟәша аредақторс, анаҩс аредақтор хада ихаҭыԥуаҩыс. 1985 шықәсазы Аҳәынҭқарратә атеатртә ҟазара аинстут аҟны илыхьчеит акандидаттә диссертациа «Аԥсуа фырхаҵаратә-романтикатә драма асценаҟны аларҵәара» атемала. Илыҭоуп аҟазараҭҵаараҟны аҭҵаарадыррақәа ркандидат ҳәа ахьӡ (аҭҵаарадырра акандидат идиплом КД № 005603).
Аԥсны жәлар Рџьынџьтәылатә еибашьраан 1992–1993 шықәсқәа рзы С. Қорсаиаԥҳа аус луан арратә корреспонденти аредақтори рыҳасаб ала раԥхьа аԥсышәала иҭыҵуаз «Аԥсадгьыл абжьы» аҟны, анаҩс ҿыц иаԥҵаз арадиостанциа «Аԥсны абжьы» (урыс бызшәала) аҟны. Аибашьра ашьҭахь ажурнал «Аԥсны аҟазара» (1994 шықәсазы ахьӡ ԥсахын «Аҟазара» ҳәа), насгьы Аԥсуа телерадиоеилахәыра рҟны лусурақәа еилалыгӡон.
1994 шықәса раахыс иаԥылҵахьеит ателедырраҭарақәа жәпакы – «Ԥҟарада аибашьра», «Аамҭеи ахаҿсахьеи», «Ашьаҭа» уҳәа егьырҭгьы. Иара убас жәларбжьаратәи афестивальқәа «Кавказ аҭынчра амазааит», «Хьыбла Гьерзмаа шәаалыԥхьоит...» редақторс дрыман (2001–2003 шш. рзы).
2007 шықәса инаркны 2015 шықәсанӡа С. Қосаиаԥда аус луан аԥсуа редакциа аредақтор хадас, Аԥсуа телерадиоеилахәыраҟны ицоз есымчабжьтәи ателедырраҭақәа «Амчыбжь агәеисыбжь» авторс даман.
Акьыԥхь аҟны лусумҭақәа: «Аԥсуа театр аҭоурых аҟнытә даҟьақәак», ажурнал «Аԥсны аҟаза», № 5, 1979 аш.; «Аҵаҿ», «Аԥсны Аҟазара», № 1, 1987 аш.; «Арҵаҩы аҵаҩы игәалашәараҿы», «Аԥсны аҟазара», № 6, 1989 аш.; «Актриса лпаҭреҭ азы ҵәаӷәақәак», агаз. «Совесткая Абхазия», марта 8, 1978 аш.; «Аҿар атеатр аҟны», ажурнал «Театр», 1986 аш.; «Атеатр аибашьра аамҭазы», ажурнал «Аҟазара», № 1, 1995 аш.; «Асценаҟны – «Ахра ашәа», «Аҟазара», № 2, 1997 аш.; «Аҟазара афестиваль», № 1, 2001 аш.; «Аԥсуа мультфильм аԥсы ҭоуп», «Аҟазара», № 1, 2006 аш.; «Ашкәакәеи аиқәаҵәеи реиндаҭлара», «Аҟазара», № 4, 2009 аш. уҳәа, зынӡа 65–70 аҟазареи аԥсуа ҟазара аусзуҩцәеи ирызку астатиақәа дравторуп.
2015 шықәсазы иҭлыжьит ашәҟәы «Виолетта Маан: актриса лмонолог».
С. В. Қәарсаиаԥҳа авторс дамоуп С. Ҷанба ихьӡ зху Аԥсуа ҳәынҭқарратә драматә театр аҭоурых иазку ателедырраҭарақәа рцикл «Атеатри аамҭеи». Иара убас ҳаамҭазы Аԥсуа телерадиоеилахәыраҟны ицо ателепроект «Акультуреи аамҭеи» авторс дамоуп.
2015 шықәса ииун мза инаркны ҳаамҭазынӡа Д. И. Гәлиа илитературатә-мемориалтә ҩны аиҳабыс дыҟоуп.
2013 шықәсазы илыхҵан ахьӡ ҳаракы «Аԥсны зҽаԥсазтәыз аусзуҩ» ҳәа. 2015 шықәсазы иланашьоуп аорден «Ахьӡ-Аԥша» III аҩаӡара.