 |
 |
 |
 |
 |
 |
Шамԥҳа М. Н. диит Гагра ақалақь март 8, 1952 шықәсазы. Далгеит Гагратәи абжьаратә школ. 1967 шықәсазы ихлыркәшеит амузикатә школ аҟны лҵара, дҭалоит Аҟәатәи амузикатә ҵараиурҭа. Уаҟа лҵара далгоит 1970 шықәсазы. Анаҩс дҭалоит В. Сараџьишьвили ихьӡ зху Қарҭтәи аҳәынҭқарратә консерваториа (1971-1976 шш.).
1976 шықәса инаркны аус луан Аҟәатәи амузикатә ҵараиурҭаҟны аконцермеистери афортепиано азы арҵаҩи рыҳасаб ала. 1983 шықәсазы дахысуеит аԥышәаизырҳара ауарӷан акласс ала. 1985 шықәсазы дҭалоит П. И. Чаиковски ихьӡ зху Москватәи аҳәынҭқарратә консерваториа (лнапхгаҩы - РСФСР аҟазара зҽаԥсазтәыз аусзуҩ, апрофессор Л. И. Роизман). 1987 шықәсазы, аконсерваториа даналга, дхынҳәуеит Аԥсныҟа, далагоит аусура солистс Аԥсуа ҳәынҭқарратә филармониаҟны, насгьы афортепиано арҵаҩыс Аҟәатәи амузикатә ҵараиурҭаҟны. 1990 шықәсазы С. П. Қьецԥҳа лнапхгарала аҵариурҭаҟны еиҿылкааит Ахәыҷтәы ахортә школ, уаҟа директорс аус луан аибашьра алагаанӡа, 1992 шықәсанӡа.
Москва аҵара лҵонаҵы, лсолотә концертқәа рҟны М. Шамԥҳа ауарӷан аҟны иналыгӡон аԥсуа жәлар рашәақәа. 1990 шықәса инаркны асолотә концертқәа Пицунда имҩаԥылго далагеит.
Лконцерттә ԥсҭазаара иалагӡаны иналыгӡеит еиуеиԥшым асолотә программақәа. Урҭ шьақәгылан анемец, аиталиан, афранцыз, англыз композиторцәа ауарӷан азы иаԥырҵақәаз аҩымҭақәа рыла. Иара убас иналыгӡон аурыс, асоветтә композиторцәа рҩымҭақәа, аԥсуа музика. М. Шамԥҳа асцена дрыцықәгылан А. Д. Ҳагба напхгара ззиуаз Аԥсуа ҳәынҭқарратә симфониатә оркестр, Н. Ҷанбеи Н. Џьынџьалԥҳаи напхгара ззыруаз Аԥсуа ҳәынҭқарратә хортә капелла. Акапелла дрыцны 1992 шықәсазы Германиатәи ақалақьқәа - Берлин, Гера, Унна, Штутградт, Кельн, Манхеим агастрольқәа мҩаԥылгеит.
Аибашьра анцоз аамҭазы М. Шамԥҳа Хьыбла Гьырзмааԥҳаи Борис Амҷбеи аконцертмеистер лысаҳабала дрыцны Ҭырқәтәыла агастрольқәа мҩаԥылгон. Аконцертқәа мҩаԥган Анкара, Бурса, Сҭампыл. Урҭ ирхашәалаз аԥара зегьы Аԥсны ацхыраараз афонд иахыԥхьаӡалан.
Аибашьра ашьҭахь, 1994 шықәса инаркны М. Шамԥҳа ауарӷантә концертқәа рымҩаԥгара ҩаԥхьа ихацлыркоит. Иара уи аамҭазы далагоит аусура Амузикатә ҵараиурҭа Гагратәи афилиал аҟны. Уаҟа лоужьҭымҭацәа рахьынтә аӡәырҩы рҵара иацырҵоит Урыстәылатәи аконсерваториақәа рҟны, рхы рыладырхәуеит еиуеиԥшым аклассикатә фестивальқәа.
1997-2008 шықәсқәа рзы Марина Шамԥҳа аус луан Пицундатәи ауахәама Аконцерттә зал аиҳабыс. Еиҿылкаауан аклассикатә, адоуҳатә музика рконцертқәа - Станиславскии Немирович-Данченком рыхьӡ зху Москватәи амузикатә театр асолист Хьыбла Гьерзмааԥҳа, Москатәи атеатр Геликон-опера асолист Алиса Гыцԥҳа, Аԥснытәи аҳәынқарратә капелла, Аҳәынҭқарратә филармониа асолистцәа - Р. Ҳагба (атенор), Н. Бжаниаԥҳа (афортеианорҳәаҩ), В. Чакмач-иԥа (атенор), г. Татевосиан (авиолончельрҳәаҩ), Г. Аҩӡԥҳа (афортепианорҳәаҩ), акамертә ансамбль "Аве-Мариа", А. Ҳагба напхгара ззиуаз Аԥснытәи асимофниатә оркестр уҳәа рконцертқәа. Урҭ аконцертқәа Аԥсны акультуратә ԥсҭазаараҟны иналукааша хҭысқәаны иҟалеит.
2008 шықәса инаркны М. Шамҳа Пицундатәи ауахәама аконцерттә зал аҟны асахьаркыратә напхгаҩыс аус луеит.
2009 шықәсазы имҩаԥылгеит асолотә концерт амузикатә фестиваль аҟны. Уи афестиваль азкын еицырдыруа ауарӷанырҳәаҩ Олег Ианченко (1939-2002) диижьҭеи 70 шықәса аҵра.
2010 шықәсазы, Аԥсни Урыстәылеи Акультура Аминистррақәа еицымҩаԥырго рпроект аҳәаақәа ирҭагӡаны, М. Шамԥҳа имҩаԥылгеит аконцертқәа Шәачатәи ауарӷантә зал аҟны, Уфа, Челиабинск, 2011 шықәсазы - Калининград ақалақь аҟны акамертә ансамбль "Аве-Мариа" далахәны.
М. Шамԥҳа илыбзоураны, 2011 шықәсазы Аԥсны анапхгара, афирма "Шуке" аусуҩцәеи Москватәи аконсерваториа аспециалист Н. Малинеи адԥхьаланы, имҩаԥыргеит Пицундатәи ауарӷан аиҭашьақәыргылараз аусура дуқәа.
Аҳәынҭқарратә ҳамҭақәа:
2004 ш. иланашьоуп «Ахӡ-Аԥша» аорден ахԥатәи аҩаӡара.
2007 ш. иланашьоуп "Аԥсны Аҳәынҭқарра жәлар рартист" ҳәа ахьӡ ҳаракы.