Апроект аоркестр амчала акыр шықәса раахыс Аҟәа ашколқәа рҿы имҩаԥыргон, иахьӡын "Амузыка сасра аҭаара."
"Ҳара еснагь иаҳҭахын аҳҭнықалақь аҳәаақәа рҭыҵра, сынтәа Аԥсны ахада 2026 шықәса ақыҭа иашықәсны ирылеиҳәеит. Акультура аминистрра ацхыраарала алшара ҳауит аконцертқәа ҳаманы атәыла ақыҭақәа рахь анеира", – ҳәа азгәеиҭеит Терзиан.
Раԥхьатәи аконцерт мҩаԥысит цәыббра 10 рзы Ҷлоу ақыҭа Акультура Аҩнаҿы. Уи иаҭааит 120-ҩык рҟынӡа ашколқәа рҵаҩцәеи, урҭ рҭаацәеи, рырҵаҩцәеи. Дара рзы аоркестр аԥсуа классикцәеи аҳәаанырцәтәи аклассикцәеи рырҿиамҭақәа нанагӡеит.
Ахәыҷқәа ирзеиҭарҳәеит амузыкатә инструментқәа, азныказы имариоушәа рбар зылшо адирижиор иусура уҳәа ртәы, уимоу алшара рырҭеит адирижиор иеиԥшҵәҟьа аоркестр анапхгара аҭара рҽазыршәарц.
Терзиан иажәақәа рыла, ашықәс нҵәаанӡа аколлектив иазԥхьагәанаҭоит атәыла ақыҭақәа 15 рҿы аконцертқәа рымҩаԥгара.
Апроект анапхгаҩы – А. Чычба ихьӡ зху Аҟәатәи аҳәынҭқарратә музыкатә ҵараиурҭа адиректор, Аԥсны Жәлар рартистка Нинель Бжьаниаԥҳа.