 |
 |
 |
 |
 |
 |
Иахьа Р. Гәымба ихьӡ зху Аԥснытәи аҳәынҭқарратә филармониа ашҭаҿы имҩаԥысит аԥсуа литература апатриарх Дырмит Гәлиа ибаҟа аҿаԥхьа ашәшьыҵәрақәа рышьҭаҵара ацеремониа.
Аԥсуа шәҟәыҩҩы игәалашәаразы абаҟахьы имҩахыҵит аминистррақәеи аусбарҭақәеи рнапхгаҩцәа, аҟазаратә, анаукатә интеллигенциа рхаҭарнакцәа.
«Иахьа ишьахәу рыцхәуп – диит ауаҩы, зыда аԥсуа бызшәа, акультура, алитература, атеатр рыӡбахәа алацәажәара уадаҩу. Дырмит Гәлиа аԥсуа жәлар зегьы рзы, ҳҵарадырра, ҳкультура рзы длашарбаган дҟалеит. Иахьа ихьӡала ҳтәыла аӡыргара алшара ҳамоуп. Уи убысҟак аҵак ду амоуп, ашәышықәсақәа ҵыргьы, ҳажәлар уи ауаҩ иҿаԥхьа ихырхәалоит. Акыр шықәса инеиԥынкыланы Дырмит Гәлиа илитературатә-мемориалтә музеи аҟны ари амш ҷыдала иазгәаҳҭон. Аха иахьатәи аҭагылазаашьа уадаҩ азгәаҭаны, аныҳәатә усмҩаԥгатәқәа рымҽхак ҳармаҷуеит», – лҳәеит Дырмит Гәлиа илитературатә-мемориалтә музеи адиреқтор Светлана Қәарсаиаԥҳа.
Аԥсны жәлар рпоет, аԥсуа ҩыра ашьаҭаркҩы Дырмит Гәлиа диит февраль 21, 1874 шықәсазы Гәылрыԥшь араион Уарча ақыҭан.