Ансамбль аԥҵан 1931 шықәсазы Н. А. Лакәаба иаԥшьгарала араионқәа иреиӷьу рхортә коллективқәа шьаҭас иҟаҵаны. Раԥхьаӡа напхгаҩыс дыҟан Аԥсны еицырдыруаз ашәаҳәаҩ, жәлар рашәаҳәаратә ҟазара ибзианы иҭызҵааз Платон Панцулаиа. Анаҩс еиуеиԥшым аамҭақәа рзы аколлектив напхгара арҭон аҟазара аусзуҩцәа – И. Лакрба, А. Чычба, Р. Гәымба, К. Гегечкори, Е. Бебиа уҳәа убас егьырҭгьы.

1970 шықәсазы ансамбль ианаршьеит «Аԥсны зҽаԥсазтәыз» ҳәа ахьӡ ҳаракы.

Ансамбль арепертуар шьақәгылоуп афольклортә, ақьабзтә ашәақәеи акәашарақәеи рыла, иара убас инанагӡоит аԥсуа композиторцәа рҩымҭақәа.

Аколлектив ианаамҭаз гастроль ҳасабла ирҭааит Асоветтә тәыла аҿацәқәа зегьы, иара убас адунеи аҳәынҭқаррақәа жәпакы – Германиа, Чехословакиа, Польша, Грециа, Ҭырқәтәыла, Шьамтәыла, Франциа, Меқсика, Аргентина, Африкатәи аҳәынҭқаррақәа.

Ансамбль жәларбжьаратәи афестивальқәа ирлауреатуп.

Иахьа ансамбль напхгара азиуеит Аԥсны Аҳәынҭқарреи Ҟарачы-Черқьестәи Ареспубликеи жәлар рартист Валери Ҭаниа. Абалетмеистер хада – Аԥсны жәлар рартист Леонид Какачиа.