Жьҭаарамза 13, асааҭ 15 рзы С.Ҷанба ихьӡ зху Аԥсуа ҳәынҭқарратә драматә театр афоие аҟны аԥсуа-адыга литературатә фестиваль «Риҵаҟны арифмақәа» аҳәаақәа ирҭагӡаны Владимир Константин-иԥа Занҭариеи Анатоли Ианкәа-иԥа Лагәлааи ргәалашәаратә хәылԥазы мҩаԥысуеит.
Аиҿкааҩцәа 2026 шықәсатәи афестиваль сынтәа зыԥсҭазаара иалҵыз Владимир Занҭариеи Анатоли Лагәлаааи ргәалашәара иазыркит.
Актәи афестиваль «Риҵаҟны арифмақәа» мҩаԥган 2018 шықәсазы. Апроект автор – Зарина Ҟаныҟәа, афестиваль адиректор – Лиубов Сосналиева. Афестиваль еиднакылоит Аԥсни Нхыҵ-Кавказтәи ареспубликақәеи рҟынтәи ашәҟәыҩҩцәа, еиҿнакаауеит итрадициатәхаз арҿиаратә еиԥыларақәа, апоезиатә ԥхьарақәа.
Владимир Занҭариеи Анатоли Лагәлааи афестиваль «Риҵаҟны арифмақәа» аҿиареи Аԥсни Нхыҵ-Кавказтәи ареспубликақәеи рыбжьара акультуратә еимадара арӷәӷәареи иадгылеит.
Агәалашәаратә хәылԥазы рхы аладырхәуеит Ҟабарда-Балкариа, Адыгатәи Ареспублика, Ҟарачы-Черқьессиа рҟынтәи аделегациақәа, иара убас Аԥснытәи апоетцәа, ашәҟәыҩҩцәа, актиорцәа. Аусмҩаԥгатә Аԥсуа ҳәынҭқарратә драматә театри Аԥсны Аҳәынҭқарра Акультура Аминистрреи рыцхыраарала имҩаԥысуеит.