 |
 |
 |
 |
 |
 |
Аделегациа иалахәуп акультура аминистр Даур Ақаҩба, Жәлар Реизара адепутат Дмитри Маршьан, Аԥсны Аџьынџьтәылатә еибашьраан хатәгәаԥхарала еибашьуаз рымадаразы аҳәынҭқарра ахада иабжьгаҩ Рисмаг Аџьынџьал, ауаажәларратә, аполитикатә усзуҩы Беслан Кәабахьиа.
Ельбурган ақыҭан Аԥснытәи аделегациа рԥылеит Ҟарачы-Черқьестәи Ареспублика Акультура аминистр Зураб Агирбов, абаза интеллигенциа рхаҭарнакцәа, ауаажәларратә усзуҩцәа, Аԥсны жәлар Рџьынџьтәылатә еибашьра хатәгәаԥхарала иалахәыз аветеранцәа, Абаза араион анапхгарра.
Аԥсны Аҳәынҭқарра Ахада Аслан Бжьаниа идҵала, гәыԥҩык абаза жәлар рхаҭарнакцәа ирыҭан аҳәынҭқарратә ҳамҭақәа. Абазеи аԥсуа жәлари реизааигәатәразы шықәсырацәала лџьабаазы «Ахьӡ-Аԥша» аорден III аҩаӡара ланашьан амилаҭтә-культуратә автономиа «Абаза» ахантәаҩы Армида Хафиз-иԥҳа Чагова. «Аԥсны зҽаԥсазтәыз артист» ҳәа ахьӡ ранашьан Ҟарачы-Черқьестәи афилармониаҟны еиҿкаау акәашаратә театр асахьаркыратә напхгаҩы Мураҭ Владимир-иԥа Гагиев, хатәгәаԥхарала Аԥсны еибашьуаз акәашаҩ Анзор Гери-иԥа Озов, Комаревцева Анна Алеқсандр-иԥҳа, Козел Елизавета Исмаил-иԥҳа.
Кавказтәи аибашьра ахыркәшара 158 шықәса ахыҵра аламҭалаз, асасцәа идырбан абазатәи алитература аклассик Бемурза Ҭҳаиҵыхә ироман ала иқәыргылаз аспектакль «Амҳаџьырқәа рышьҭала».
Аспектакль ашьҭахь аделегациа идикылеит араион ахада Руслан Кужев. Аиԥылараҿы иалацәажәон аԥсуа-абаза жәлар ретноси рбызшәеи реиқәырхара апроблемақәеи азҵаарақәеи.
Маи 20 аҽны ақыҭа Ԥсыж имҩаԥысраны иҟоуп ауаажәларратәи, аполитикатәи аусзуҩ, Аԥсуа-Абаза жәлар жәларбжьаратәи рассоциациа ашьаҭаркҩы Тарас Шамба игәаларшәара иазку ахәылԥаз.
