 |
 |
 |
 |
 |
 |
Аԥсны имҩаԥгахоит Аахыҵ Уаԥстәыла акультура амшқәа лаҵара 30 инаркны рашәара 2-нӡа.
«Акультура амшқәа рымҩаԥгара - ари акыр зҵазкуа шьаҿоуп агуманитартә еиҿцәажәарақәа рырҭбаареи аҭынчра аиқәырхареи рзы. Ас еиԥш иҟоу аимадарақәа аиашьаратә жәларқәа ркультуреи, рҭоурыхи, рҵасқәеи иааигәаны абадырра иацхраауеит», – ҳәа азгәеиҭеит Даур Ақаҩба.
Аофициалла Акультура амшқәа аартхоит лаҵара 31 Самсон Ҷанба ихьӡ зху аԥсуа ҳәынҭқарратә драматә театр аҟны. Уаҟа идырбахоит Хетагуров ихьӡ зху Аҳәынҭкарратә драматә театр аспектакль «Ауапа еиқәаҵәа».
Рашәара 1 азы Р. Гәымба ихьӡ зху Аԥснытәи аҳәынҭқарратә филармониаҿ иқәгылоит Аахыҵ Уаԥстәылатәи аҳәынҭқарратә ансамбль «Симд».
Аусмҩаԥгатәқәа ирылагоит асааҭ 18:00 рзы, аҩналара хәыдаԥсадоуп.
Аԥсны акультура амшқәа Аахыҵ Уаԥстәыла имҩаԥган Цхинвал 2023 шықәса мшаԥы 5-6 рзы. Ауснагӡатә алахәхаразы Аԥснынтәи Цхинвалҟа инеит Аԥсуа ҳәынҭқарратә аҿар ртеатр актиорцәеи Аҳәынҭқарратә ансамбль акәашаҩцәеи злахәу аделегациа. Аделегациа напхгара аиҭон Аԥсны акультура аминистр Даур Ақаҩба.