Абар сышәҟәы, сгәы иҭоу зегь, аа:
Шьҭа уаҳа исымоузеи ҳәатәыс?
Ари шәшаԥыло здыруеит заа –
Сшәыԥхьаӡашт иаԥсам уаҩԥсыс.
Аха маҷк иеилышәкаар схьаа,
Срыцҳанашьар шәгәыбылра,
Сыншәыжьрым усҟан ус шәара.
Ҿымҭроуп раԥхьа схы зызца,
Ихашәҵа: сзырԥхашьаз абас,
Еснагь сара сгәаҵа иҭаз,
Аӡбахә шәдыррымызт зынӡа –
Гәыӷрак сымазар мчыбжьык,
Ҳқыҭаҿ шәшызбо ала знык, –
Есымша исаҳаларц шәыбжьы,
Ажәак нашәаҳәан сызхара
Шәеиҭазбаанӡа сара
Схәыцларц – аҵхи амши еиԥшьы.
Аха, ирҳәоит, уаҩ дышәҭахым,
Агәҿыӷь шәанаргоит ақыҭа…
Ҳарҭгьы араҟа ссирла ҳҭәым,
Шәбара ҳшеигәырӷьоугь, ҳәарада.
Шәзымҩахыҵзеи ҳахьынхоз?
Иалхуа уаҩ дызхым ақыҭа?
Ҽа ҭыԥк ҟалозу ҳаиқәзыршәоз?
Сыҟамзаарыз саргь гәырҩада.
Ацәанырра иқәыԥшыз сҽамҭа,
(Ишԥасиааирыз исаԥыс?)
Исгәаԥхоз аӡә дсыԥшаарын,
Ҩыза иашас дысшьарын,
Ихәыҷқәа сроурын аныс.
Ҽаӡәы!.. О, мап, адунеихаан,
Са сгәы исҭомызт, иӡбуп, –
Ажәҩан иаҳасабхьеит заа,
Анцәа иҳәахьеит: уара сутәуп!
Сыԥсҭазаара зегь шаҳаҭуп
Уара уԥылара ишазкыз,
Анцәа усзылбааишьҭит сгәаҭа,
Усоут сыԥсаанӡа хьчаҩыс.
Ԥхыӡ узбон, ҵхыбжьон, шьыжьы,
Ҳаиниаанӡа усгәаԥхахьан,
Уԥшышьа-хаа сгәы азцахьан,
Иҵӡозеи… исаҳауан убжьы…
Ԥхыӡмызт, мап, изгоит агәра,
Уаныҩналаҵәҟьа уздырт,
Схы-сҿы иаразнак амца анырт,
Исҳәеит гәаныла: аа, иара!
Иҳәа, убжьами исаҳауаз, –
Игәаҟуаз аиҭымцәа санрыхәоз,
Ма гәыӷрала санныҳәоз –
Са сыгәхьаа зыжьжьауаз?!
Уара уами, уи аминуҭаз,
Аҭынчраҿы, ианҵәцараз,
Сара сылаԥш назықәшәа,
Ицәырҟьа-цәырасыз знаур,
Зхы надызҵаз сыжәҩахыр,
Сгәы зырӷәӷәашаз ажәа зҳәа?
Сзыхьчо амаалықь уиеиԥшу?
Ма схыхра иаҿу гьангьашу?
Исыҭ са сгәыҩбарақәа рҭак!
Издыруада ақәыԥшра иатәызар,
Имцызар сызлақәоу зынӡак!
Ишәарҭоу рыцҳарак сзыԥшызар?..
Иԥшыз! Сара слахьынҵа,
Иахьарнахыс уара иусҭоит,
Уҿаԥхьа сылаӷырӡқәа касҭәоит,
Сыхьча, – сгәыҭҳәаа, сыԥсыҭҳәаа азхаҵа…
Сгәаҭ: сеилызкаауа џьара
Уаҩԥс дыҟаӡам, избоит.
Сыгәхьаа еиҳа-еиҳа сарҩоит,
Саҿуп аҵыкәкәара аԥсра!
Сузыԥшуп, ирҿыха сгәы,
Знык иадамзаргь усызцәырҵ,
Салх сызлоу, сызмоу аԥхыӡ,
Ҽыԥныҳәала, – ишуҭаху! …
Салгоит… Аԥхьара – аԥсра,
Агәыҭҟьа сагоит сӡыҭны…
Изгоит ууаҩра агәра, –
Сразҟымҩа змаздо игәаӷьны…