Аԥсны акультуратә хҭыс хадақәа иреиуоу афестиваль аадыртуеит Џьакомо Пуччини иопера «Тоска» ала. Ахацәа рпартиа хадақәа нарыгӡоит аоператә шәаҳәаҩцәа Арсен Согомониани Владислав Сулимскии. Флориа лроль - Хьыбла Гьерзмааԥҳа.

Афестиваль иалахәуп Хьыбла Герзмааԥҳа еиҿылкааз Актәи жәларбжьаратәи аицлабра алауреатцәа – Алексеи Кулагин, Виачеслав Василев, Глеб Периазев, Дамир Садуахасов, Мариа Лупарева, Ливеи Хоу.

Ауснагӡатә мҩаԥнагоит Москватәи аҳәынҭқарратә академиатә симфониатә оркестр, адирижиор – Урыстәыла зҽаԥсазтәыз артист, Атеатр ду адирижиор Антон Гришанин.

Пицунда амузыкантцәа инарыгӡараны иҟоуп еицырдыруа урыстәылатәии аҳәаанырцәтәии композиторцәа рариақәеи рдуетқәеи.

Афестиваль иацҵахоит артистцәеи амузыкатә ҵараиурҭақәа рҵаҩцәеи реиԥыларала. Цәыббра 1 азы афестиваль алахәылацәеи Чычба ихьӡ зху Аҟәатәи амузыкатә ҵараиурҭа аҵаҩцәеи еиԥылоит.

Аконцертқәа мҩаԥгахоит Урыстәыла ақалақьқәа 18 рҟны, иара убас Беларуссиа, Ҟазахстан.

Жәларбжьаратәи амузыкатә фестиваль «Хьыбла Гьерзмааԥҳа шәаалыԥхьоит…» аԥылҵеит еицырдыруа аԥсуа оператә шәаҳәаҩы, Аԥсни Урыстәылеи жәлар рартистка Хьыбла Гьерзмааԥҳа 2001 шықәсазы.